Feature "Profil Wirausaha"

Hobi dados Usaha

Eni Lestari menika salah satunggalipun wirausahawan ingkang usahanipun nyade sandhangan. Piyambakipun miwiti usaha kanthi raos remen marang dedagangan. Putra nomor setunggal saking Bapak Waljiyo saha Ibu Ruwetiyah menika sampun nyade sandhangan wiwit taksih SMA. Mawi cara nyade muter ing sakiwa tengen griyanipun. Saengga Ibu Eni menika sampun kangge gesang kanthi mandiri.

Sakmenika Ibu Eni mapan ing dhusun Gonjen, Tamantirta, Kasihan, Bantul, Yogyakarta. Garwanipun Bapak Wartijo utawi Dawa lan gadhah putra kalih. Ingkang kaping pisan sekolah ing SMP. Dene ingkang putra kaping kalih nembe TK. Kulawarganipun sami nyengkuyung pedamelanipun saengga saged tetep ngrembaka. Menawi sami ribet, putra-putranipun dipuntitipaken dhateng tiyang sepuhipun. Tuladhanipun menawi piyambakipun badhe kulakan sandhangan ing Tanah Abang, Jakarta.

Ibu Eni menika gadhah toko ingkang mapan ing Peken Beringharjo lantai 2, kanthi nama toko sandhangan EnyMar, nama sakmenika sareng-sareng kaliyan rayinipun. Ananging sakmenika rayinipun sampun boten mapan ing Yogyakarta ananging ndherek garwanipun wonten Temanggung. Saengga Ibu Eni piyambak ingkang ngurusi toko menika, dipunsengkuyung dening para karyawan. Usaha sakmenika mboten namung nyade sandhangan kemawon, ananging nampi narima pesenan. Kadosta nampi pesenan kebaya kangge pawiwahan utawi kebaya wisuda. Piyambakipun gadhah pangajab bilih usahanipun saged langkung ngrembaka. Salah satunggalipun cara ingkang dipunlampahi inggih menika daamel kartu nama kangge pelanggan. Uga damel plastik ingkang ngewrat nama saha alamat saking tokonipun.

Wisata Budaya "Dolan ing Taman Sari"

T

Aman Sari menika salah satunggaling papan wisata ingkang wonten ing kitha Ngayogyakarta Hadiningrat. Mapanipun mboten tebih kaliyan Kraton Yogyakarta lan Peken Ngasem. Rikala jaman rumiyin Taman Sari menika minangka papan kangge para putri-putri saha selir-selir raja saking kraton menawi siram. Amargi wonten ing tengahing Taman Sari menika wonten kolam ingkang ageng. Kathah para wisatawan asing ingkang dolan wonten ing pemandian Taman Sari menika. Awit kita saged napak tilas sejarah saking Kraton Ngayogyakarta mawi ningali kanthi mlaku-mlaku ing wisata Taman Sari menika.

 Taman Sari menika wiyar sanget saha swasana lan kahanan ing salebeting papan menika endah. Saengga boten nggumunaken kathah tiyang tindak wonten Taman Sari menika kangge poto-poto kemawon. Taman Sari menika mapanipun wonten ing tengahing omah-omah saking warga Yogyakarta ingkang wonten ing mlebet benteng. Saengga anggenipun mlaku-mlaku ing Taman Sari menika kita saged ugi ningali kahanan lan swasana masyarakat Yogyakarta ingkang rukun lan tentrem. Reginipun karcis anggenipun badhe mlebet Taman Sari menika mirah sanget. Kangge masyarakat asli saking Indonesia menika namung bayar tigang ewu kemawon. Bilih kangge tiyang saking negari sanes menika kedah bayar pitung ewu kemawon. Menawi badhe ngersakaken pemandu namung cekap bayar sedasa ewu.

       Boten tebih saking Taman Sari menika wonten Alun-Alun Kidul. Wondene ing tengah-tengah alun-alun menika wonten wit ringin kembar. Masyarakat Yogyakarta menika gadhah kapitadosan bilih sinten ingkang saged ngelampahi tengahing wit ringin kanthi mripatipu dipuntutup menika pepinginanipun saged dados kasunyatan. Saengga bibar saking Taman Sari menika para wisatawan saged mampir ing Alun-Alun Kidul kangge nyobi lewat ing tengahing ringin kembar. Amargi ing kasunyatanipun boten gampil anggenipun nindakaken saengga kathah tiyang ingkang badhe membuktikan lewat ringin menika. Pungkasanipun kula ngajak sinten kemawon sami dhateng wonten Taman Sari ing Yogyakarta. Awit saged dados satunggalipun wujud kita ngregani asiling budaya para leluhur. Kangge masyarakat ugi kedah sami njagi lan nglestantunaken wisata budaya ing Taman Sari menika supados langkung ngrembaka.

      

Wacana Prosedural "WIJI KEDHAWUNG MINANGKA OBAT"

      Wiji kedhawung pranyata kathah mempangatipun, saged kangge ngilangaken raos nyeri nalika wanita nembe nggarapsari. Sanesipun saged kangge nambani masuk angin, weteng kembung, demam nifas, lsp. Ing maneka warni racikan jamu asring dipuntemokaken wiji kedhawung. Menika tuladha ginanipun wiji kedhawung minangka dados obat.

-          Nambani lara weteng nalika nggarapsari

1.      Ndheplok 4 wiji kedhawung ingkang sampun digoreng sangan, nuli kedhawung wau sampun dipunonceki saha dideplok

2.      Salajengipun dipungodhok ngginakaken toya tigang gelas, dipuntabahi ron sembung

3.      Dipuntengga ngantos umub

4.      Menawi sampun umub kinten-kinten kalih gelas diudhunke lan di dhem

5.      Menawi sampun adhem nuli dipununjuk

-          Nambani dhemam nifas

1.      Mendhet 8 wiji kedhawung

2.      Dipungoreng sangan, sabanjuripun dipunonceki lan dipundamel bubuk kanthi dipundheplok

3.      Wiji kedhawung ingkang sampun bubuk menika dipuncuri toya panas, lajeng dipun tambahi madu, lan diunjuk babar pisan.

-          Nambani lara desentri

1.      Bahan-bahan:

a.       Sapertelon gegem ron poko

b.      Seprapat gegem kayu angin

c.       10 lembar ron jambu kluthuk

d.      Sagrigih kunir

e.       Sesendhok teh adas

f.       Setengah jari pulosari

g.      5 wiji kedhawung

h.      1/5 sendhok teh jinten ireng

i.        Gula aren

2.      Bahan dipunkumbah lajeng dipunkethok-kethok

3.      Salajengipun dipungodhog ngginakaken 4 gelas toya ingkang resik

4.      Dipungodhog ngantos umub kinten-kinten dados 2 gelas

5.      Sesampunipun adhem, nuli dipunsaring lan dipunperang dados kalih lajeng dipununjuk

6.      Dipununjuk sedinten kaping kalih