GRIYA KOS SAGED DADOS MUMPANGAT UTAWI KACILAKAN MASYARAKAT
Bantul. Senin tanggal
16 September 2013 Satuan Reskrim Polres Magelang kerjasama kaliyan Polres
Bantul nangkep salah satunggaling tersangka curanmor. Inggih menika Agung
Nugraha minangka dipunmangertosi dados salah satunggaling tersangka curanmor ing wilayah Magelang saha
Daerah Istimewa Yogyakarta (DIY). Piyambakipun dipuntangkep ing griya kosipun
ingkang mapan wonten Sonopakis Lor Rt 01 Ngestiharjo, Kasihan, Bantul.
Dipunpirsani kaliyan Bapak Amiranta minangka ketua rt 01, kedadean menika saged
kalampahan kanthi lancar. Sakderengipun nangkep tersangka menika, Satuan
Reskrim Polres Magelang ingkang dipunampingi kaliyan Polres Bantul rawuh wonten
griyanipun Bapak Amiranta saperlu badhe ijin menawi badhe nangkep salah
satunggal warga ingkang wonten mriku inggih menika Agung Nugraha. Saklajengipun
menika sesarengan sami dhateng wonten griya kosipun tersangka.
Griya kos menika dados
salah satunggaling panggenan kangge mapan
tiyang ingkang saking daerah sanes. Awit mawi griya kos menika tiyang
saged tilem utawi nindakaken kagiatan ingkang sami nalika wonten griyanipun
piyambak. Kathah griya kos mliginipun wonten panggenan ing sakiwa tengenipun
wonten sekolah utawi kampus. Awit griya kos menika saged mbiyantu sanget
dhumateng para mahasiswa saking njawi. Wujudipun ugi manekawarni, gumantung
kaliyan reginipun. Ananging regi menika ugi gumantung kaliyan piranti-piranti
ingkang dipunsiapaken.
Ngengingi kedadean
Agung Nugraha ingkang dados tersangka curanmor lan ketangkep ing griya kos.
Mila sakmenika saged dados perkawis ingkang wigatos babagan griya kos. Amarga
piyambakipun kos ing Sonopakis Lor ingkang kathah dipunsewakake griya kos. Awit
lingkungan ingkang adem ayem saha saengga kathah tiyang remen manggen wonten
mrika. Ananging griya kos menika ugi saged dados sasaran kangge para maling.
Saengga tiyang menika kedah nggatosaken kawontenanipun griya kos. Kangge tiyang ingkang kagungan kos, tiyang
ingkang gadhah griya kos saha kangge para masyarakat sakiwa tengenipun. Awit
griya kos menika saged mbeta mumpangat utawi kacilakan.
Tiyang gadhah griya kos
menika biasanipun amargi kagungan griya ingkang kosong. Saengga dipundadosaken
griya kos kemawon awit saged mumpangati. Utawi amargi gadhah griya ingkang
kathah lan dipunbangun griya kos saengga saged dados pikantuk arta saking
menika. Ananging kangge tiyang ingkang gadhah griya kos menika kedah ngati-ati.
Awit tiyang menika kathah sanget lan sipat saha tindak tandukipun ugi
beda-beda. Pramila menawi badhe nampi tiyang kos menika kedah dipunsuwuni pirsa
saking pundi asalipun. Manawi prelu kedah ningali KTP (Kartu Tanda Penduduk)
saking tiyang menika. Tiyang ingkang gadhah kos utawi indhuk semang menika
saged nyuwun pirsa menapa kepreluanipun saengga badhe ngekos wonten daerah mrika.
Ananging wontenipun tersangka Agung Nugraha ketangkep ing griya kos menika,
dipunmangertosi bilih Bapak Ian ingkang kagungan griya kos menika mboten
nggatosaken sinten kemawon ingkang ngekos. Saking menika pramila wigatos sanget
mangertosi tiyang ingkang enggal badhe mapan wonten griya kos. Menawi perlu
kedah ndamel tata tertib utawi peraturan ingkang sinerat kangge ngawekani
tiyang ingkang wonten kos.
Kangge tiyang ingkang
badhe kos kedah mangertosi ancasing piyambakipun badhe ngekos. Menawi kangge sekolah
pramila saged pados griya kos ingkang mboten tebih kaliyan anggenipun sekolah.
Menawi tiyang menika sampun nyambut damel pramila madosi griya kos menika ugi
ingkang mboten tebih kaliyan papan panggenanipun nyambut damel. Ugi perlu
ningali kados pundi kahanan sakiwa tengenipun. Kedah pados panggenan ingkang
sae, ayem, tentrem saha masyarakatipun nggadhahi unggah-ungguh. Langkung sae
manggen wonten griya kos ingkang menawi ingkang kagungan ugi gesang ing ngriku.
Saengga saged mangertosi menapa kegiatanipun tiyang ingkang kos. Ingkang kos
kedah mangerstosi peraturanipun saengga sedaya saged tertib. Mliginipun lapor
utawi nyuwun ijin kaliyan bapak rt supados dipundata bilih badhe gesang ing
tlatah menika. Kaliyan masyarakat sakiwa tengenipun ugi kedah gesang tembayatan
saha urip bebarengan. Menawi wonten kegiatan masyarakat saged srawung saha
paring pambiyantu. Kadosta saged ndherek kagiatan muda-mudi utawi gotong royong
nalika dinten prei sekolah saha nyambut damel.
Lajeng salah
satunggaling perkawis ingkang wigatos
inggih menika wontenipun pamangku daerah mliginipun rt ing mrika. Bapak
rt menika kedah mangertosi sinten kemawon ingkang manggen wonten tlatahipun.
Pramila dados rt menika kedah gadhah seratan nama-nama keluarga ingkang
dipunmandegani. Saengga ugi perlu nyerat sinten kemawon tiyang kos ing
daerahipun. Awit ngengingi tersangka curanmor ing ngandhap menika, bapak rt 01
ing Sonopakis Lor inggih menika Bapak Amiranta mboten mangertosi menawi wonten
warganipun ingkang nama Agung Nugraha. Amargi nalika kos wonten mrika mboten
nyuwun ijin utawi lapor rumiyin. Pramila laporan utawi seratan ijin manggen
menika wigatos sanget kangge sinten kemawon.
Bapak Amiranta menika
sampun dangu dados rt. Piyambakipun sampun ngendika marang warganipun bilih
menawi wonten tiyang enggal menika kedah lapor. Mliginipun kangge tiyang
ingkang manggen ing griya kos. Minangka dados rt menika, Bapak Amir sampun nate
ngempalaken sedaya tiyang ingkang nggadhahi griya kos saha ingkang kos. Saperlu
dipun paringi pirsa kados pundi unggah-unggihing menawi gesang wonten daerah
Sonopakis Lor mliginipun ing rt 01 menika. Awit ngawekani menawi wonten
kedadosan ingkang mboten dipunkajenganken. Menawi perlu saged kerjasama polisi
saengga menawi wonten kedadean menapa kemawon saged nyuwun tulung.
Saklajengipun dhumateng
para masyarakat sedaya kemawon kedah sami tata tertib saha unggah-ungguh.
Supados sedaya uga sami ngurmati dening tiyang sanesipun. Masyarakat ing sakiwa
tengenipun griya kos menika ugi kedah sami njagi tlatahipun. Menawi wonten
warganipun ingkang tumindak ala kedah dipundangu utawi dipunparingi pirsa.
Sedaya kemawon mliginipun ingkang kos awit tiyang kos menika mboten sami adat
istiadatipun kaliyan tiyang ingkang asli saking tlatah menika. Tiyang kos utawi
ingkang enggal manggen wonten mriku uga kedah mangertosi kados pundi adat
istiadat masyarakatipun. Kedah ndherek sesrawungan kaliyan masyarakatipun
supados saged mangertosi kahananing sakiwa tengenipun.
Mliginipun wonten kitha
Ngayogyakarta menika ingkang misuwur awit unggah-ungguhing masyarakatipun.
Kadosta tiyang enem kedah ngginakaken basa Jawi krama nalika guneman kaliyan
tiyang ingkang langkung sepuh. Ugi kedah ngurmati tiyang ingkang langkung
sepuh. Tuladhanipun menawi nembe wonten tiyang ingkang guneman lan badhe
mlampah wonten ngajengipun kedah ngucapaken ndherek langkung utawi nyuwun sewu.
Menawi unggah-ungguhing masyarakat Jawi ing tlatah menika beda kaliya adat
ingkang saking asalipun, tiyang kos utawi ingkang enggal kedah ngurmati.
Caranipun mawi ndherek ngelampahi unggah-ungguh menika. Amargi saben tlatah
menika nggadhahi ciri khas piyambak-piyambak. Masyarakat ingkang asli menawi
tiyang sanes menika gadhah tindak tanduk ingkang beda uga kedah ngurmati.
Minangka tindak tandukipun mboten ndadosaken masyarakat sakiwa tengenipun dados
murang tata.
Ngengingi sedaya
perkawis ing ngandhap menika perlu sanget kerjasama sedaya kemawon kangge njagi
tentreming kahanan masyarakat. Sedaya kedah sami-sami gesang tembayatan. Menawi
wonten ingkang nembe gerah utawi kacingkrangan anggenipun njangkepi kabetahan
ing pagesangan kedah dipuntulung. Griya kos menika kedah saged mbeta mumpangat.
Awit mawi griya kos menika tiyang ingkang gadhah griya saged pikantuk arta
kangge pagesanganipun piyambak kaliyan kulawarga. Kangge tiyang ingkang kos
menika griya kos menika saged dados salah satunggaling panggenan kangge mapan
nalika tebih saking griyanipun piyambak. Pramila awit tiyang kos kaliyan
masyarakat sakiwa tengenipun kedah sesrawungan. Awit saking srawung menika
saged nuwuhaken raosing gesang sesarengan. Masyarakat ing sakiwa tengenipun
griya kos menika saged dados kulawarga ingkang nomer kalih nalika tebih saking
kulawarga asalipun. Saengga menawi nembe susah saged nyuwun tulung kaliyan tangga
tepalihipun. Mboten pareng tiyang kos menika tumindak asusila utawi tumindak
ala, amarga menawi wonten kedadean menika masyarakat tlatahipun ingkang saged
dados pikantuk perkawis.
